كل عمري بستنا الشتا عادي
بشغف ووله وكل مرة كان الشوق مرة للطرقات ومرة ولبلادي
شي للمطر هونيك
لك للبرد وللزرع والشجر ولياسمينات شباكي
للدخنة اللي بتطلع من تمي بايام التلج
للصبح هونيك
للدفاية اللي كنت احضن اطرافي جنبا
للكستنا واللوز
لكاسة الشاي اللي كانت تجمعنا
بس هالسنة شوقي للشتا ناقص
ناقص الشغف ناقص
مشتاقة لمسكة ايدك لتمحي البرد
لريحة الارض من بعد المطر
والنظرة اللي بعيونك لتشيل كل الضباب
والضحكة اللي عشفافك لتنور دفا جوا القلب وتنسيني كل هالعذاب
!قولك كان كتير علينا انو القدر يجمع قلبين بوطن
انا وانت وشوية صور قاعدين على كومة حجر
على رصيف حافظ اسامينا
وطرقات شهدت على ماضينا
وعصافير كتير وسع هالمدى تحتفل فينا
وصحاب واهل وذكريات
قولك كتير ؟
No comments:
Post a Comment